Óli Björn Kárason, fyrrverandi þingmaður og ritstjóri, er gestur Spjallsins að þessu sinni.

Tilefnið er ný bók hans, Villigötur valdsins – til varnar frelsinu gegn miðstýringu, ríkisafskiptum og rétthugsun, en samtalið vindur fljótt upp á sig og verður að víðtæku uppgjöri við íslensk stjórnmál og þróun samfélagsins undanfarna áratugi.

Óli Björn ræðir hvers vegna hægrimenn misstu sjálfstraustið og hugmyndafræðilegan kraft, hvernig Sjálfstæðisflokkurinn fjarlægðist hluta af sínum gömlu rótum og hvers vegna hann telur hörð hugmyndafræðileg átök nauðsynleg í heilbrigðu lýðræðissamfélagi.

Rætt er um ríkisrekstur og einkaframtak, skattkerfið, heilbrigðisþjónustu, Ríkisútvarpið og þá róttæku hugmynd Óla Björns að gjörbreyta hlutverki þess. Þá er farið ítarlega yfir útlendingamálin, breytingarnar á útlendingalögum árið 2016 og þann pólitíska rétttrúnað sem hann telur hafa haft mikil áhrif á stjórnmál síðustu ára.

Undir lokin rifjar Óli Björn upp átökin innan ríkisstjórnar Sjálfstæðisflokks, Framsóknar og Vinstri grænna, hvalveiðibann Svandísar Svavarsdóttur og ákvörðun sína um að hætta sem formaður þingflokks Sjálfstæðisflokksins.

Ítarlegt samtal um frelsi einstaklingsins, vald ríkisins, hugmyndafræði og hvað fór úrskeiðis hjá íslenskum hægrimönnum.