Axel Pétur Axelsson er nýjasti gestur Spjallsins með Frosta Logasyni. Axel hefur tilkynnt formlegt framboð sitt til embætti forseta Íslands en fjölmiðlar hafa til þessa ekki sýnt honum neina athygli. Axel er fúlasta alvara með framboði sínu og hefur hann háleitar hugmyndir um hlutverk embættisins og hvað hann mundi gera næði hann kjöri. Hann mundi til dæmis vilja leggja af alla tekju- og eignaskatta og fara í það að þjóðnýta auðlindir í þágu almennings í landinu. Hann segir frímúrararegluna á Íslandi vera leynilega valdaklíku sem hafi til þessa ráðið alltof miklu og vill hann afnema tak hennar á stjórn landsins með því að reka alla ráðherra og embættismenn.