Ritstjórarnir, þeir Jón G. Hauksson og Sigurður Már Jónsson, heilsa nýju ári með kraftmikilli hluthafaumræðu. Sem endranær fara þeir yfir það hvað sé að gerast í íslensku kauphöllinni og breytingar á leikmannamarkaði forstjóranna. Nýtt fólk í brúnni hjá Bláa lóninu og Alvotech fær nýja merkingu í umfjöllun þeirra félaga. Einnig ræða þeir Amaroch og hækkun á verði félaga með Grænlandstengingar.

Góðir gestir komu í þáttinn að venju en fyrstur kom Þorsteinn Þorgeirsson hagfræðingur til að ræða við um bandarísku efnahagsvélina og hvers hlutabréfaeigendur í Bandaríkjunum geta vænst. Þorsteinn fór yfir helstu hagtölur og hvaða áhrif efnahagsstefna Donalds Trumps hefur. Miklar fjárfestingar hafa verið boðaðar í Bandaríkjunum um leið og Donald Trump, forseti Bandaríkjanna, segir að hann vilji hækka útgjöld landsins til varnarmála um helming á næsta ári og leggur til að þau nemi alls 1,5 billjónum bandaríkjadala. Myndi það vera hækkun um 50% eða úr einni billjón bandaríkjadala. Þorsteinn útskýrir hvernig hann ætlar að fjármagna það.

Að lokum kemur Konráð S. Guðjónsson hagfræðingur sem er genginn til liðs við IFS/Reitun í spjall við ritstjórana en hann er með athyglisverða greiningu á nýhöfnu ári. Konráð rýnir í kristalskúluna og segir okkur hve nýsamþykkt fjárlög eru raunhæf.