Ritstjórarnir, þeir Jón G. Hauksson og Sigurður Már Jónsson, fara yfir efnahagsástandið og skoða helstu tíðindi á hlutabréfamarkaði. Hlutabréfavísitalan sleikir nú 3000 stigin en hvað gerist næstu vikur, nú þegar við erum að upplifa verðbólguskot? Hlutabréfamarkaðurinn er búinn að þola hátt raunvaxtastig í alltof langan tíma og þyrstir í vaxtalækkun en nýjustu tölur auka ekki bjartsýni fyrir næstu vaxtaákvörðun Seðlabankans, þann 4. febrúar næstkomandi. Eru það stjórnvöld með kerfisbreytingum á vörugjöldum og eldsneytisverði sem bera ábyrgð á þróun verðbólgunnar? Þá fara ritstjórarnir yfir nýjustu félög á matseðli fjárfestanna en allmörg félög eru nú á leiðinni í skráningu, þar á meðal Styrkás og Drangar sem hafa sterk tengsl við Skel fjárfestingafélag.

Í seinni hluta þáttarins er ítarlegt viðtal við Kristófer Oliversson, framkvæmdastjóra Center hótels og formann fyrirtækja í hótel-og gistiþjónustu. Kristófer hefur rekið hótelstarfsemi í Reykjavík í ríflega þrjá áratugi og þekkir þær miklu breytingar og áskoranir sem fylgja rekstrinum. Hann sá tækifæri í að byggja upp miðbæjarhótel í Reykjavík þar sem hann rekur nú níu hótel. Kristófer segir að sumu leyti sé erfiðast að eiga við breytingar stjórnvalda sem oft séu lítt fyrirsjáanlegar en hafi mikil áhrif á rekstrarstöðu ferðaþjónustunnar.